Ka përfunduar protesta masive e mbajtur sot në Hagë kundër padrejtësive në proceset gjyqësore të Gjykatës Speciale. Rreth 10 mijë shqiptarë nga Kosova dhe diaspora u mblodhën pranë ndërtesës së Gjykatës për të shprehur mbështetjen ndaj ish-krerëve të Ushtrisë Çlirimtare të Kosovës dhe për të kërkuar respekt për sakrificën e luftëtarëve të lirisë.
Protesta nisi me intonimin e himnit kombëtar shqiptar dhe atij të Kosovës, ndërsa atmosfera u mbush me flamuj kuq e zi dhe thirrje të fuqishme për drejtësi. Pjesëmarrësve iu drejtuan disa figura të njohura publike. Ish-ambasadori holandez në Kosovë, Robert Bosch, kujtoi bisedat që kishte pasur me Hashim Thaçin dhe theksoi se një gjykatë e drejtë nuk mund ta dënojë atë pasi, sipas tij, “nuk ka prova”.
Ndërkohë, kryetari i OVL-UÇK-së, Hysni Gucati, deklaroi se “UÇK nuk lindi nga urrejtja, por nga padrejtësia”, duke theksuar se liria ishte rezultat i gjakut dhe sakrificës së mijëra shqiptarëve. Ai i bëri thirrje botës demokratike të mos mbyllë sytë ndaj padrejtësive të Speciales.
Në një fjalim tjetër, Fatmir Koci, një nga organizatorët e protestës, pyeti me tone të ashpra: “A ishim ne agresori? Apo luftuam në shtëpitë tona?” duke theksuar se populli i Kosovës kërkoi vetëm liri e dinjitet, e jo territore.
Kulmin e protestës e shënoi performanca e këngëtarit atdhetar Arif Vladi, i cili emocionoi turmën me këngë për lirinë dhe sakrificën e shqiptarëve.
Ky manifestim masiv, i zhvilluar në atmosferë paqësore, dëshmoi unitetin dhe solidaritetin e shqiptarëve kudo që jetojnë, duke përcjellë një mesazh të qartë: kërkesa për drejtësi të vërtetë dhe përfundimin e padrejtësive ndaj UÇK-së.
