Ministrja e Drejtësisë, Albulena Haxhiu, ka reaguar pas vendimit për moscertifikimin e Listës Serbe për zgjedhjet lokale, duke e cilësuar atë si një fitore të rëndësishme për demokracinë, integritetin e procesit zgjedhor dhe sigurinë qytetare e shtetërore në Republikën e Kosovës.
Sipas ministres Haxhiu, Lista Serbe ka vepruar në mënyrë të përsëritur kundër parimeve kushtetuese dhe ka cenuar rendin demokratik të vendit. Ajo theksoi se ky subjekt politik nuk përfaqëson interesat e qytetarëve serbë të Kosovës, por shërben si një zgjatim i ndikimit të presidentit serb Aleksandar Vuçiq.
“Lista Serbe ka dëshmuar që nuk synon përfaqësimin qytetar, por që është dorë e zgjatur e Vuçiqit,” shkroi ministrja Haxhiu në një postim publik.
Ajo rikujtoi gjithashtu sulmin terrorist në Banjskë, të organizuar nga Milan Radoiçiq – të cilin e cilësoi si kryetar faktik të Listës Serbe dhe një nga figurat kryesore kriminale në veri të Kosovës – duke e konsideruar këtë akt si një kërcënim serioz ndaj rendit kushtetues dhe sigurisë së shtetit.
“Vendimi për moscertifikimin e saj është i drejtë, legjitim dhe në përputhje të plotë me parimet kushtetuese të Republikës së Kosovës,” theksoi ministrja, duke shtuar se ky është një hap i rëndësishëm drejt zgjedhjeve të lira dhe pa ndërhyrje nga struktura kriminale apo të jashtme.
Në përmbyllje, ministrja Haxhiu garantoi se institucionet e Kosovës do të vazhdojnë të jenë të përkushtuara për të siguruar një proces zgjedhor të drejtë, gjithëpërfshirës dhe demokratik, ku pjesëmarrja politike mbetet e mundur vetëm për ata që respektojnë ligjin, Kushtetutën dhe sovranitetin e vendit.
