Gjykata e Apelit të Juridiksionit të përgjithshëm ka lënë në fuqi masën e sigurimit “arrest në burg” për Fatjon Bushgjokën dhe Petrit Çakrrin.
Ata dyshohet për vrasjen e 23-vjeçarit Renis Dobra, mbrëmjen e 8 korrikut, ku vetëm një ditë më pas trupi i të riut u gjet në afërsi të liqenit të Shkopetit.
Gjatë zhvillimit të seancës, avokatët Arbër Qehaja, Fred Gjoni dhe Halit Zhuka zhvilluan debate të ashpra me prokurorin Etien Kapo.
Po ashtu, debate me prokurorin zhvilluan edhe dy të dyshuarit, sa i përket provave që ngrenë dyshime për përfshirjen e tyre në krim, raporton euronews.al.
Avokatët kërkuan të cilësohej i paligjshëm arrestimi dhe lirimi i menjëhershëm i dy të dyshuarve.
Në përfundim të seancës, gjykata miratoi kërkesën e prokurorisë duke lënë në burg të dyshuarit dhe caktoi afat për mbledhjen e provave të tjera shtesë me qëllim provimin e akuzës.
Në kërkim për këtë ngjarje janë edhe Kristi dhe Aleksandër Bushgjoka. Sipas hetimeve, autorët e kanë ndjekur të riun që nga qyteti i Burrelit dhe, gjatë rrugës për në banesën e tij, e kanë dhunuar dhe mbytur. Më pas, për të fshehur krimin, automjetin e tij e hodhën në liqenin e Shkopetit, së bashku me trupin e pajetë brenda.
Dyshimet e hetimeve tregojnë se 23-vjeçari është rrëmbyer, më pas mbytur me litar dhe autorët kanë tentuar të zhdukin kufomën, por dështuan pasi trupi u gjet në brigjet e liqenit të Shkopetit.
