Vedat Muriqi ka nisur me formë pozitive përgatitjet për sezonin e ri, duke realizuar golin e fitores në minutën e 92-të në miqësoren e zhvilluar të dielën ndaj skuadrës Shabab Al-Ahli nga Emiratet e Bashkuara Arabe.
Mallorca triumfoi me rezultat 2-1 në duelin që u luajt në Kufstein të Austrisë.
Ndeshja nisi më mirë për ekipin nga Dubai, që arriti të kalojë në epërsi në minutën e 29-të me golin e brazilianit Mateusao. Skuadra spanjolle reagoi pas pushimit, duke shtuar ritmin dhe duke kërkuar vazhdimisht golin e barazimit.
Përpjekjet e tyre u shpërblyen në minutën e 55-të, kur Javier Llabres gjeti rrjetën dhe riktheu gjithçka në baraspeshë.
Mallorca vazhdoi të dominojë në pjesën e dytë, duke e përfshirë në lojë edhe Vedat Muriqin, në përpjekje për ta mbyllur ndeshjen me fitore.
Në minutat shtesë, Mallorca fitoi një penallti, dhe ishte pikërisht sulmuesi kosovar që mori përgjegjësinë. Me qetësi dhe saktësi, Muriqi shënoi golin e dytë për skuadrën e tij, duke siguruar një fitore që ndihmon për të ngritur moralin në prag të sezonit të ri në La Liga.
31-vjeçari nga Prizreni ka treguar edhe një herë pse është lojtari më i besuar në repartin ofensiv të Mallorcas. Ai së fundmi ka rinovuar kontratën me klubin deri në vitin 2029.
