Arieta Spahiu, bashkëshortja e ish-policit të Kosovës, Arbnor Spahiu – i cili ndodhet në paraburgim në Serbi që nga fillimi i qershorit – ka reaguar sërish me tone të ashpra ndaj institucioneve të Kosovës, duke i akuzuar për heshtje dhe mungesë veprimi ndaj asaj që ajo e konsideron burgosje të padrejtë.
Në një deklaratë për televizionin Dukagjini, Spahiu theksoi se burri i saj po mbahet në kushte të rënda, pa asnjë provë të qartë dhe pa ndonjë ndërhyrje konkrete nga autoritetet shtetërore të Kosovës.
“Ku është shteti? Ku është kryeministri Albin Kurti, presidentja Vjosa Osmani, ministria e Jashtme, ambasadat? Çfarë po bëjnë për këtë rast të padrejtë? Asgjë! Me heshtjen tuaj, po e pranoni burgosjen e tij, po bëheni bashkëfajtorë!”, u shpreh ajo.
Spahiu ka kërkuar reagim urgjent nga të gjitha institucionet, duke theksuar se lirimi i bashkëshortit të saj nuk është një kërkesë për mëshirë, por një obligim shtetëror ndaj një qytetari të pafajshëm.
Në reagimin e saj të fuqishëm, të titulluar “MJAFT MË HESHTJE!”, ajo akuzoi drejtuesit e institucioneve për neglizhencë dhe braktisje të qytetarëve të vet.
Ajo paralajmëroi se do të vazhdojë luftën publike për drejtësi dhe nuk do të ndalet derisa bashkëshorti i saj të lirohet.
“Unë nuk jam politikane, por kam zërin tim dhe dhembjen time. Dhe këtë zë do ta përdor çdo ditë, derisa ta trondit vendin!”, tha ajo, duke e cilësuar rastin si test të ndërgjegjes dhe përgjegjësisë shtetërore.
