Gjinekologia Merita Demiri Demolli në podcastin “Shëndeti në rend të parë” ka folur për rëndësinë e kontrolleve të rregullta gjinekologjike, ciklin menstrual, shëndetin riprodhues, infeksionet vaginale, menopauzën, etj.
Doktoresha Demiri-Demolli ka treguar se kur rekomandohet për vajzat që t’i kenë kontrollet e para te gjinekologu.
“Zakonisht kontrollet gjinekologjike te vajza fillohen nga mosha 13-15 vjeçare.. është periudha kur vajza fillon të ketë menstruacionet e para. Nuk është domosdoshmërish në këtë periudhë të bëhet vizitë në karrigen gjinekologjike, por mjafton vetëm biseda, sqarimi i gjendjes në të cilën po kalon ajo është shumë e rëndësishme”, tha ajo.
Tutje, gjinekologia Demiri-Demolli tha se zakonisht 13-15 vjeçaret duhet të bëjnë një vizitë te gjinekologu për ndryshimet që fillojnë në organizëm.
“Ndërsa vizita e parë ka rëndësi se ato vajza duhet të dinë se viti i parë kur vjen menstruacionet jo domosdoshmërish është i rregullt…”, u shpreh ajo.
