Kryeministri i Shqipërisë, Edi Rama, ka deklaruar se nuk ka marrëveshje dhe as plane për marrëveshje të ngjashme me atë të Italisë për emigrantët, as me Britaninë e Madhe dhe as me vende të tjera.
Këtë e bëri të ditur gjatë një konference të përbashkët me kryeministrin britanik, Keir Starmer, në Tiranë.
Rama ka theksuar se marrëveshja me Italinë është e vetme dhe ka ndodhur për shkak të një marrëdhënieje të veçantë mes dy vendeve, si dhe për shkak të afërsisë gjeografike.
Rama ka deklaruar se edhe vende të tjera i kanë kërkuar Shqipërisë marrëveshje të ngjashme, por janë refuzuar.
“Që në fillim kemi qenë të qartë se kjo ishte një marrëveshje vetëm me Italinë. Ka të bëjë me marrëdhënien tonë të veçantë dhe me pozicionin tonë gjeografik. Për të qenë i sinqertë, shumë shtete na kanë kërkuar marrëveshje të ngjashme, por ne u kemi thënë jo, sepse jemi besnikë ndaj ‘martesës’ me Italinë. Të tjerat janë thjesht dashuri”, ka deklaruar Rama.
Ndërsa, kryeministri britanik ka thënë se vendi i tij po e diskuton një marrëveshje të tillë me shumë shtete të tjera.
Mes tjerash, ai ka theksuar se po punojnë për t’i kthyer migrantët e paligjshëm shqiptarë.
