Me iniciativë të Njësisë për Monitorimin e Ndërmarrjeve Publike të Ministrisë së Ekonomisë, sot është ndërprerë veprimtaria ilegale e strukturave paralele në fabrikën e ujit në Zubin Potok. Lajmin e ka bërë të ditur ministrja e Ekonomisë, Artane Rizvanolli, përmes një postimi në rrjetet sociale.
Sipas ministres Rizvanolli, kjo fabrikë është një aset kritik për furnizimin me ujë të pijshëm për mijëra qytetarë në komunat veriore të Republikës së Kosovës. “Marrja nën kontroll e këtij aseti është çështje e sigurisë, e shëndetit publik dhe e shtrirjes së kontrollit institucional,” ka deklaruar ajo.
Tutje, Rizvanolli bëri të ditur se nga tani, Kompania Rajonale e Ujësjellësit “Mitrovica” do të jetë përgjegjëse për funksionimin e fabrikës, duke u siguruar që ky sistem jetik të operojë në përputhje me standardet ligjore dhe teknike të Republikës së Kosovës.
“Furnizimi me ujë nuk mund të jetë mjet presioni politik apo kontrolli nga jashtë. Është një e drejtë bazike e qytetarëve tanë, dhe përgjegjësi e institucioneve tona publike që ajo të realizohet në mënyrë të sigurt dhe të barabartë për të gjithë,” ka theksuar ministrja.
Ajo ka falënderuar Policinë e Kosovës për mbështetjen gjatë këtij operacioni dhe gjithashtu KRU Mitrovicën për gatishmërinë për të shërbyer pa dallim të gjithë qytetarëve të vendit.
Ky hap konsiderohet si një masë e rëndësishme drejt forcimit të sundimit të ligjit dhe funksionalizimit të plotë të institucioneve të Republikës së Kosovës në gjithë territorin e saj.
