E shtuna e parë e majit ka sjellë një atmosferë të ngrohtë dhe gjallëruese në bregdetin e Vlorës, duke shënuar fillimin e sezonit turistik përpara shpalljes zyrtare.
Temperaturat e larta dhe moti i kthjellët kanë nxitur qindra pushues, vendas dhe të huaj, të mbushin plazhet përgjatë vijës bregdetare.
Nga Uji i Ftohtë deri në Radhimë, shezllonet janë mbushur me njerëz që po shijojnë diellin dhe freskinë e detit.
Familje me fëmijë, të rinj në grup dhe çifte turistësh kanë shijuar pamjen e bukur, notin dhe rrezet e para të verës që ka ardhur më herët këtë vit.
Ndërkohë, operatorët turistikë dhe bizneset buzë detit janë angazhuar në përgatitjet për sezonin e plotë veror, duke përfituar nga ky fluks i hershëm vizitorësh.
Gjallëria që ka përfshirë qytetin dhe numri i madh i pushuesve japin sinjale pozitive për një sezon veror premtues dhe plot aktivitet./Euronews Albania
