Deputetja Jeta Statovci deklaron se opozita ka krijuar “aleancë opozitare të bunkerizuar dhe idhnake ndaj rezultatit të zgjedhjeve”.
Në një postim në Facebook, Statovci thotë se pozicionet e palëve që kanë humbur zgjedhjet nuk janë legjitime as të dobishme për vendin.
“Të gjithë deputetët e Kuvendit të Kosovës si institucioni më i rëndësishëm, pa dallim nëse janë në opozitë, pozitë, pjesë e shumicës apo pakicave etnike, duhet të jenë konstruktiv dhe të mos kundërshtojnë vullnetin e shumicës së qytetarëve të Kosovës, që është i shprehur qartë në rezultatin e zgjedhjeve”, shkroi Statovci.
Postimi i plotë:
Aleancë opozitare e bunkerizuar dhe idhnake ndaj rezultatit të zgjedhjeve.
Pozicionet destruktive të palëve që kanë humbur zgjedhjet nuk janë as legjitime e as të dobishme për vendin.
Këto pozicione janë mospajtim me vullnetin e qytetarëve të Kosovës dhe në dëm të këtij procesi.
Të gjithë deputetët e Kuvendit të Kosovës si institucioni më i rëndësishëm, pa dallim nëse janë në opozitë, pozitë, pjesë e shumicës apo pakicave etnike, duhet të jenë konstruktiv dhe të mos kundërshtojnë vullnetin e shumicës së qytetarëve të Kosovës, që është i shprehur qartë në rezultatin e zgjedhjeve.
Nëse këto mospajtime janë në këtë nivel që ndalin edhe mundësinë për konstituim të institucioneve, e nuk ka tejkalim të situatës, vendit nuk i mbetet tjetër pos zgjedhjeve të reja, meqë fituesi me 48 deputetë, nuk mund të reduktohet në një zë të parëndësishëm siç po promovon një aleancë opozitare e bunkerizuar dhe idhnake ndaj rezultatit të zgjedhjeve.
