Në kohën kur në Kuvendin e Kosovës sot nga ora 12:00 do të mblidhen ata që u mandatuan nga qytetarët në zgjedhjet e 9 shkurtit, për konstituimin e legjislativit për herë të tretë, jashtë këtij objekti do të zhvillohet protestë, përmes së cilës do të kundërshtohet rritja e çmimit të energjisë elektrike.
Organizatorët duke ftuar qytetarët në protestë, kanë paralajmëruar përshkallëzim të protestës, bllokim rrugësh e institucionesh nëse kërkesa e tyre nuk merret parasysh, duke thënë se nuk do të ndalen deri kur të ketë pezullim të këtij vendimi të ZRrE-së.
“Natyrisht prej këtij sheshi do t’i bëjmë thirrje gjithë deputetëve të Republikës së Kosovës që të shtyjnë përpara këtë proces, dhe momentin e parë që konstituohet Kuvendi të thirret menjëherë në Komisionin për Energji, ZRrE-ja për raportim, dhe sa më parë ky vendim të pezullohet. Nëse edhe pas protestës vazhdohet të mos ketë reflektim natyrisht se do të jemi të detyruar që protestat t’i masovizojmë dhe ky masovizim nënkupton edhe përshkallëzim. Nuk jemi të lumtur që t’i japim kësaj lloj mesazhesh as nuk jemi në frymën e asaj që përshkallëzohet situata. Por, nëse do të ketë nevojë siç kemi thënë në fillim do të bllokojmë edhe rrugët edhe institucionet në mënyrë që zëri të dëgjohet edhe më tutje”, ka dklaruar dje në konferencë, Besnik Shabiu nga Grupi “Asnjë cent më shumë”.
Kurse, avokati, Ardian Bajraktari ka theksuar se krahas padisë kanë punuar edhe në hartimin e propozimit për masë të përkohshme, çka do të shtynte sipas tij, ekzekutimin e vendimit.
Zyra e Rregullatorit për Energji, së fundi aprovoi tarifat e reja që reflektojnë rritjen lineare të tarifave të rregulluara prej 16.1 % për të gjitha kategoritë e konsumatorëve në kuadër të shërbimit universal. Sipas ZRRE-së kërkesa/propozimi fillestar i KOSTT-it për të Hyrat e Lejuara Maksimale për OST/OT – ka qenë 101.878 milionë euro, ndërsa ZRRE i ka aprovuar këto të hyra në vlerën prej 88.198 milionë euro.
Ndërsa kërkesa/propozimi fillestar i KEDS-it për të Hyrat e Lejuara Maksimale për OSSH ka qenë 214.45 milionë euron, ndërsa ZRRE i ka aprovuar këto të hyra në vlerën prej 180.653 milionë euro. Ndërkaq kërkesa/propozimi fillestar i KESCO-s për të Hyrat e Lejuara Maksimale për FSHU ka qene 447.626 milionë euro, ndërsa ZRRE i ka aprovuar këto të hyra në vlerën prej 435.626 milionë euro, ku përfshihen operatorët e licencuar OSSH dhe OST/OT. Sipas ZRRE-së, tarifat me blloqe për konsumatorët shtëpiak dhe tarifat ditë-natë për të gjitha kategoritë e konsumatorëve do të përdoren për të nxitur konsumin efiçient të energjisë elektrike.
Shumica e komenteve të dërguar në ZRRE, kanë qenë kundër shtrenjtimit të rrymës, përfshirë edhe Presidenca e Kosovës, e cila kundërshtoi propozimin për rritjen e çmimit të energjisë elektrike. ZRRE thotë se ka përkrahje edhe nga Vjena për këtë çështje.
Tarifat e reja do të hyjnë në fuqi më 1 maj
Sipas tarifave të reja të miratuar nga ZRRE, konsumatorët që shpenzojnë deri në 800 kilovatë brenda një muaji do të paguajnë 9.05 centë për kilovat nga 7.79 centë sa paguajnë tani.
Ndërsa për ata që shpenzojnë më shumë se 800 kilovatë, kilovati do të kushtojë 15.43 centë nga 13.29 sa është aktualisht.
Gjatë periudhës nga 1 prilli deri më 30 shtator nga ora 23:00 deri në 08:00 të mëngjesit, çmimi për kilovat është shtrenjtuar në 3.88 centë nga 3.34 centë për ata që shpenzojnë deri në 800 kilovatë. Ndërkaq, ata që shpenzojnë më shumë se 800 kilovatë do të paguajnë 7.28 centë për kilovat nga 6.27 sa paguajnë aktualisht.
