Pas një hetimi dyjavor, Policia e Durrësit ka finalizuar operacionin policor të koduar “Storm 3”, i cili çoi në zbulimin e një ambienti të përshtatur për prostitucion.
Dy shtetase kineze, R. W (54 vjeçe) dhe X. X (41 vjeçe), janë në hetim për veprat penale “Prostitucioni” dhe “Shfrytëzimi i prostitucionit”.
Gjithashtu, gjatë kontrollit të banesës që këto dy shtetase kishin marrë me qira në lagjen nr.13, Plazh, Durrës, janë gjetur dhe proceduar penalisht edhe 6 shtetas shqiptarë nga Durrësi dhe Kruja, të cilët ishin gjetur në ambientin e përdorur për aktivitetin kriminal.
Hetimet kanë zbuluar se një grup i strukturuar kriminal, i përbërë nga shtetas kinezë, rekruton shtetase kineze në Kinë dhe i dërgon ato në Shqipëri për të ushtruar prostitucionin, duke siguruar apartamente dhe organizuar takime me klientë përmes faqeve online.
Hetimet janë vazhduar në bashkëpunim me Prokurorinë për identifikimin dhe kapjen e personave të tjerë të përfshirë në këtë aktivitet kriminal.
Në cilësinë e provës materiale, policia ka sekuestruar dy pasaporta të shtetasve kineze, 86,400 lekë, 440 Euro, si dhe disa aparate celularë, karta telefoni dhe karta banke.
Materialet procedurale janë kaluar Prokurorisë për veprime të mëtejshme/ rtsh
