Ministri për Administrimin e Pushtetit Lokal, Elbert Krasniqi, ka bërë të ditur se studentët e Universitetit të Prizrenit “Ukshin Hoti” do të kenë mundësi të reja për të përfituar përmes pjesëmarrjes së tyre në programin e bashkëpunimit ndërkufitar.
Për këtë edhe kanë nënshkruar marrëveshje me rektorin e këtij universiteti, Mentor Alishani.
“Në kuadër të programit të bashkëpunimit ndërkufitar Kosovë – Maqedoni e Veriut, sot kam nënshkruar marrëveshjen me rektorin e Universitetit të Prizrenit ‘Ukshin Hoti’, Mentor Alishani, me qëllim që të ofrojmë mundësi për studentët nga Universiteti i Prizrenit të përfitojnë përmes pjesëmarrjes së tyre në programin e bashkëpunimit ndërkufitar”, ka treguar ministri.
Tutje ai tha se në këtë program, studentët do të bëhen pjesë e përgatitjes së projekt propozimeve, përgatitjeve financiare për projektet në fjalë si dhe do të arrijnë ta kuptojnë rëndësinë e projekteve në kuadër të bashkëpunimit ndërkufitar. “Sektor ky i cili bazohet në zhvillimin e zonave kufitare dhe zhvillimin e turizmit malor si dhe shkëmbimin ndërkulturor të komuniteteve”, shtoi ai.
Gjithashtu, ka bërë të ditur se ka vizituar pikën kufitare në Shishtavec, ku ka parë nga afër mundësitë që ka kjo zonë ndërkufitare për zhvillimin e turizmit malor.
“Nga programi i bashkëpunimit ndërkufitar Kosovë – Shqipëri në këtë zonë është financuar infrastruktura rrugore, sistemi energjetik dhe janë krijuar kushte më të mira për banorët e kësaj zone”, tregoi ai.
