Policia e Kosovës ka bërë të ditur se hetuesit nga Njësia për Hetimin e Trafikimit me Narkotik në Prizren, në vazhdën e trajtimit të një rasti, ka arrestuar dy të dyshuar nën dyshimin për trafikim me lëndë narkotike.
Sipas njoftimit, policia ka hasur dhe sekuestruar dëshmitë si në vijim: – Substancë narkotike, dyshohet të jetë e llojit marihuanë, me peshë 10 kg e 510 gr; – Një armë zjarri kalibër 7.62 mm, me një karikator me 8 fishekë; – Dy automjete me targa vendore; si dhe – Tre telefona.
“Operacioni ka vazhduar me kontrollimin e një shtëpie dhe një lokali, ku janë gjetur dhe sekuestruar dëshmitë tjera: – Substancë narkotike, dyshohet të jetë e llojit marihuanë, me peshë 874 gram; – Katër fishekë; – Dy peshore elektronike; – Dy kuti me pajisje për pastrim të armëve; – Një foli plastike; si dhe – Të holla 3965 euro”, thuhet në njoftimin e policisë.
Lidhur më rastin janë ndaluar dy të dyshuar: N.I., (viti i lindjes 1985, mashkull kosovar) dhe E.M., (viti i lindjes 2000, mashkull kosovar). Po ashtu, policia ka informacione se i përfshirë në rast është edhe një i dyshuar tjetër, i njohur për policinë. Të dyshuarit janë intervistuar në prezencë të avokatëve dhe me vendim me shkrim të prokurorit kujdestar, janë ndaluar për 48 orë.
