Në një aksion të koordinuar kundër shmangies së tatimit, informalitetit dhe shkeljeve të tjera ligjore në marrëdhëniet e punës, autoritetet kanë zhvilluar kontrolle në 32 auto-parkingje në qytetin e Ferizajt, ku janë konstatuar shkelje nga pronarët e bizneseve.
Sipas raportit policor, dje, nga ora 09:20 deri në 15:30, Drejtoria për Hetimin e Krimeve Ekonomike dhe Korrupsionit, përkatësisht Njësia Rajonale për Hetimin e Krimeve Ekonomike dhe Korrupsionit në Ferizaj, me autorizim të Prokurorisë Themelore në Ferizaj dhe në bashkëpunim me institucionet e tjera ligjzbatuese, ka realizuar një aksion kontrolli në kuadër të luftimit të ekonomisë joformale.
Gjatë inspektimeve të kryera në 32 auto-parkingje janë evidentuar shkelje të ndryshme ligjore nga pronarët e bizneseve.
Autoritetet bëjnë të ditur se inspektorët kanë përpiluar procesverbale për të gjitha gjetjet e evidentuara, ndërsa në periudhën në vijim do të ndërmerren veprimet procedurale përkatëse, në përputhje me kompetencat ligjore.
Rasti është iniciuar si “Shmangie nga tatimi”.
