Sot u shënua 27 vjetori i Epopesë së Ushtrisë Çlirimtare të Kosovës (UÇK), e cila përfaqëson një nga momentet më të rëndësishme dhe dramatike në historinë e Kosovës, duke simbolizuar qëndresën heroike të popullit shqiptar përballë shtypjes dhe agresionit serb, qendresën e familjes Jashari në Prekaz, me 5,6 dhe 7 mars të vitit 1998.
Në ceremoninë qendrore të mbajtur në kazermën “Adem Jashari” në Prishtinë morën pjesë presidentja Vjosa Osmani, kryeministri Albin Kurti, Rifat Jashari, ambasador të akredituar në Kosovë, e personalitete të ndryshme.
Në këtë ceremoni ishin të ftuar edhe të gjithë liderët e partive politike parlamentare në Kosovë por në bazë të fotografive që ka bërë KosovaNews këtë ceremoni e bojkotuan të gjithë liderët e partive opozitare.
Aty munguan kryetari i PDK-së Memli Krasniqi, ai i LDK-së Lumir Abdixhiku dhe kryetari i AAK-së Ramush Haradinaj.
Sipas burimeve të KosovaNews krerët e partive opozitare kanë qenë të ftuar nga organizatorët, atyre u ishin rezervuar edhe karriget se ku do të uleshin mirëpo ato mbeten të zbrazura pasiqë nuk ishin prezent pa dhënë ndonjë arsye.
Bojkotimin e aktiviteteve për nder të shënimit të 27 vjetorit të Epopesë së UÇK-së e kishin paralajmëruar edhe organizatat e dala nga lufta OVL e UÇK-së të cilët nuk morën pjesë në ceremoni megjithëse edhe ata i kishin vendet e rezervuara.
