Ministri i Bujqësisë, Faton Peci, ka reaguar ashpër lidhur me çështjen e pronës së Ministrisë së Bujqësisë në Ulpianë, e cila ende nuk i është kthyer institucionit. Përmes një deklarate publike, ministri ka theksuar se tashmë kanë kaluar 18 muaj (550 ditë) që kur Gjykata ka vendosur një masë të përkohshme, duke pamundësuar kthimin e kësaj prone shtetërore tek titullari i saj legjitim.
Megjithëse kjo masë është cilësuar si e përkohshme, sipas Pecit, tendenca është që ajo të shndërrohet në një bllokadë të përhershme, duke krijuar shqetësime të mëdha për tjetërsimin e pronave publike dhe mosveprimin e institucioneve të drejtësisë.
- Ministri ka ngritur disa pyetje serioze, duke kërkuar përgjegjësi nga sistemi i drejtësisë:
- Si u bë e mundur që prona shtetërore të tjetërsohet tek një person fizik, kur një veprim i tillë është i ndaluar me ligj?
- Cilët janë gjyqtarët që e kanë marrë këtë vendim, i cili ka lejuar kalimin e 159 metrave katrorë të pronës shtetërore tek një individ privat?
- Si ndodhi që nga një hapësirë e tjetërsuar prej 159 metrash katrorë, të ushtrohet një veprimtari biznesore në një sipërfaqe shumë më të madhe, prej rreth 900 metrash katrorë, që ende është pronë e Ministrisë së Bujqësisë?
Ministri Peci ka theksuar gjithashtu se, ndërkohë që sistemi i drejtësisë ka qenë shumë aktiv në intervistimin e zyrtarëve të lartë për çështje të tjera, nuk ka asnjë informacion nëse janë thirrur për intervistim ish-ministrat e Bujqësisë, të cilët mund të kenë dijeni për këtë skandal pronësor.
Sipas tij, dëmi i shkaktuar institucioneve dhe interesit publik nga abuzimi me pronat e ministrisë kap shifra qindra milionëshe, ndërsa drejtësia vazhdon të heshtë. Ai ka kujtuar se Kodi Penal përcakton qartë përgjegjësinë ligjore edhe në rastet kur titullari i një institucioni toleron abuzimin dhe tjetërsimin e pronave shtetërore përmes mosveprimit.
Në fund të postimit , ministri Peci ka kritikuar institucionet e drejtësisë, duke e përshkruar situatën si një rast të pastër ku mekanizmat e drejtësisë kanë zgjedhur të mbyllin sytë përballë abuzimeve.
