Drama për zgjedhjen e Kryeprokurorit të shtetit po vazhdon edhe pse kanë kaluar 5 muaj që nga propozimi dhe votimi i Blerim Isufajt për Kryeprokuror të ri të Shtetit nga ana e Këshilli Prokurorial të Kosovës.
Kandidati për kryeprokuror Shqipdon Fazliu, i cili ishte renditur i dyti në konkursin për Kryeprokuror sipas burimeve të KosovaNews e ka paditur Këshillin Prokurorial të Kosovës në Gjykatën Themelore në Departamentin Administrativ, duke e goditur vendimin e KPK-së rreth procesit të përzgjedhjes së Kryeprokurorit të Shtetit.
Këtë gjë e ka konfirmuar vetë prokurori Fazliu përmes një përgjigje me shkrim dhënë për KosovanNews.
“E konfirmoj se javën e kaluar kemi paraqitur padinë ndaj KPK-sw, për procesin qe ka të bëjë me përzgjedhjen e pozitës se Kryeprokurorit te Shtetit. Për të tjerat, ju lus të kontaktoni me avokatin tim, z. Flakron Sylejmani, qe këto dite gjendet ne pushim”, ka thënë shkurt prokurori Shqipdon Fazliu.
Kujtojmë që dy kandidatët për kryeprokuror Shqipdon Fazli dhe Armend Hamiti fillimisht kanë bërë ankesë në Gjykatën Kushtetuese për vlerësim të kushtetutshmërisë së procesit.
Mirëpo Gjykata Kushtetuese më 4 korrik të këtij viti i ka hedhur poshtë ankesat e kandidatëve për Kryeprokuror të Shtetit, lidhur me emërimin e Blerim Isufajt në pozitën e Kryeprokurorit të Shtetit.
Kjo gjykatë sqaron se “kërkesat përkatëse i shpallë të papranueshme mbi baza procedurale, sepse parashtruesit e kërkesave nuk i kanë shteruar mjetet juridike siç është përcaktuar me paragrafin 7 të nenit 113 Juridiksioni dhe Palët e Autorizuara të Kushtetutës së Republikës së Kosovës”.
Emri i kandidatit për kryeprokuror Blerim Isufaj po vazhdon të qëndroj në tavolinën e Presidentes Vjosa Osmani në pritje për t’u dekretuar apo edhe për t’u refuzuar.
Përzgjedhja e prokurorit Isufaj nga ana e KPK-së u shoqërua me shumë pakënaqësi si nga ana e kandidatëve tjerë po ashtu edhe nga shoqëria civile dhe ambasadat.
Kujtojmë që Ambasada e Britanisë së Madhe, e cila kishte ndihmuar dhe monitoruar KPK-në me vite të tëra ishte anashkaluar nga kjo e fundit gjatë shpalljes së konkursit për Kryeprokuror, gjë për të cilën kishte reaguar vetë Ambasada duke thënë se ndjehet e befasuar nga ky veprim i KPK-së.
