Trajneri i Milanit, Sergio Conceição, nuk e përjashton mundësinë e një transferimi në janar të sulmuesit të Manchester United-it, Marcus Rashford, duke thënë: “Është një lojtar i mirë, do të shohim…”
Në një konferencë për shtyp të premten, Conceição konfirmoi se Milani po e ndjek Rashfordin, por theksoi se ende nuk ka diskutuar strategjitë e merkatos së janarit me drejtuesit e klubit.
“E vërteta është se drejtuesit kanë tentuar të flasin me mua për këtë çështje [transferimet], por koha nuk ishte e përshtatshme sepse kishim ndeshje për të luajtur,” tha ai. “Preferoj të flas për këtë në momentin e duhur. Për momentin, gjëja më e rëndësishme për mua është ndeshja e radhës. E di që kjo është një temë që duhet diskutuar, por tani për tani, fokusi im është në ndeshjen e nesërme. Ndoshta mund ta diskutojmë këtë çështje pas ndeshjes.”
Megjithatë, një gazetar e pyeti nëse Rashford do ta përmirësonte skuadrën aktuale të Milanit.
“Ju përpiqeni në çdo mënyrë… në Portugali është edhe më keq! Këtu flisni për futboll, dhe kjo më pëlqen, por ndonjëherë dikush bën një përpjekje,” u përgjigj Conceição fillimisht, me humor.
“Por është në rregull, jam këtu për t’u përgjigjur. Rashford është një lojtar i mirë, si të tjerët. Do të shohim se çfarë do të ndodhë.”
Sipas burimeve të ndryshme, Milani thuhet se ka nisur tashmë bisedimet me përfaqësuesit e Rashfordit, por për të përfunduar marrëveshjen, sulmuesi i Manchester United-it duhet të pranojë një ulje page.
Sky Sport Italia raportoi se Milani i ka ofruar mundësinë e një huazimi me opsion blerjeje për Rashfordin.
Rashford ka regjistruar shtatë gola dhe tre asistime në 24 paraqitje për Manchester United këtë sezon, por nuk është pjesë e planeve të trajnerit Ruben Amorim. Klube të tjera të Serie A, si Como dhe Juventus, janë gjithashtu të interesuara për 27-vjeçarin.
