Ministri i Mbrojtjes, Ejup Maqedonci, e ka dekoruar me Medaljen për “Shërbim të Shquar” ambasadorin e ShBA-së, Jeffrey Hovenier, me rastin e përfundimit të mandatit të tij në Kosovë.
Maqedonci ka thënë se në takimin e tyre lamtumirës kanë biseduar për bashkëpunimet e Qeverisë së Kosovës me ShBA-në, veçanërisht në fushat e mbrojtjes dhe të sigurisë.
“Duke e dekoruar me Medaljen për Shërbim të Shquar e falënderova Ambasadorin Hovenier për angazhimin e tij për vendin tonë, si Ambasador i ShBA-së në Kosovë. Në një takim të përzemërt në mbyllje të mandatit të tij në Kosovë, me Ambasadorin Hovenier biseduam për bashkëpunimet aq të frytshme të Qeverisë së Kosovës me ShBA-në, veçanërisht në fushat e mbrojtjes dhe të sigurisë. Shtetet e Bashkuara të Amerikës janë aleati dhe partneri kyç i Republikës së Kosovës, tradicionalisht dhe historikisht”, ka shkruar ai në Facebook.
