Kryetari i komunës së Kamenicës, Kadri Rahimaj, nëpërmjet një shkrimi në profilin e tij në Facebook, ka thënë se Agim Aliu, kryetar i Bordit të Asociacionit, po gënjen publikisht. Ai ka thënë se Agim Aliu dhe Sazan Ibrahimi nuk kanë lejuar asnjëherë komunat e Veriut të Kosovës të bëhen pjesë e AKK-së.
“Agim Aliu – Kryetar i Bordit të Asociacionit po gënjen publikisht. Komunat e Veriut të Kosovës – Leposaviqi, Zveçani, e Zubin Potoku nuk janë pjesë e Asociacionit të Komunave të Kosovës.
Ato më 14 dhe 15 shtator të vitit 2023 kanë votuar në kuvende komunale për t’u bërë pjesë e AKK-së. Përkundër që vendimi është vlerësuar si i ligjshëm në MAPL, Agim Aliu dhe Sazan Ibrahimi nuk kanë lejuar asnjëherë Komunat e Veriut të Kosovës të bëhen pjesë e AKK-së”, ka thënë Rahimaj.
Rahimaj ka thënë se personalisht ka kërkuar në rrugë zyrtare të ua dërgojnë dëshminë e fletës së anëtarësisë, siç e ka çdo komunë anëtare, ata janë pergjigjur se se një gjë të tillë nuk e kanë.
“Fakti i dytë është se në asnjë raport të auditmit nuk mund të gjeni se këto komuna janë anëtare. Në raport paraqitet lista e anëtarëve dhe participimi i komunave.
Fakti i tretë, që në raportin që ka sjellur vet sot bordi, shihet se Komunat e Veriut të Kosovës nuk janë anëtare.
Ku po dëshirojnë t’i anëtarësojnë Komunat e Veriut të Kosovës, kasta e vjetër politike?”, ka thënë Rahimaj në reagimin e tij, duke i bashkëngjitur edhe tabelat e të hyrave.
