Vala po sjell internet të shpejtë 4G+ dhe 5G edhe në rajonin e Prizrenit, me përmirësime që pritet të përfundojnë në fund të nëntorit. Ekipet e Telekomit të Kosovës, së bashku me kontraktorin “Ericsson Nikola Tesla”, kanë punuar intensivisht për instalimin e antenave të teknologjisë më të avancuar, duke e modernizuar kështu rrjetin në qytetet si Prizren, Dragash dhe Mamushë.
Në njoftimin e Valës thuhet se pas përfundimit të punimeve në këtë rajon, modernizimi do të vazhdojë në Gjakovë dhe Pejë, duke e përfunduar kështu projektin për zëvendësimin e teknologjisë së vjetruar. Tashmë, konsumatorët në Prishtinë, Gjilan, Ferizaj, Mitrovicë dhe rajonin e Prizrenit po përjetojnë shërbime të shpejta me 4G+ dhe 5G.
Në fillim të tetorit, modernizimi do të shtrihet edhe në Rahovec, Gjakovë dhe Deçan, me një plan për të mbuluar Pejën, Klinën dhe Istogun. Me këtë dinamikë, deri në fund të nëntorit, Vala do të arrijë 100% të rrjetit me teknologjinë 4G+ dhe mbi 65% me 5G.
“Konsumatorët që ende nuk e kanë aktivizuar 5G-në dhe kanë nevojë për internet super të shpejtë, ose ata që kanë ndonjë problem teknik me telefonat e tyre, i ftojmë të na kontaktojnë në Qendrën e Thirrjeve (0800 10 000), në rrjetet sociale, apo në pikat tona të shitjes, ku do të marrin ndihmën e nevojshme për konfigurim, në mënyrë që të shijojnë edhe ata shërbimin cilësor dhe internetin super të shpejtë”, thuhet në njoftim.
