Në mëngjesin e së enjtes në Mitrovicë të Veriut u hap pika e parë e Postës së Kosovës, ku qytetarët do të kryejnë të gjitha shërbimet postare dhe të pagesave të ndryshme, por edhe të pajisen me kartelat e Valës dhe me shërbimet tjera të Telekomit të Kosovës.
Të pranishëm në hapjen e kësaj dege ishin edhe ministrja e Ekonomisë, Artane Rizvanolli dhe ministri i Administrimit të Pushtetit Lokal, Elbert Krasniqi.
Ministrat thanë se në veri të vendit do të hapen gjithsej 9 pika të postës, ku do të mund të kryhen shërbime të ndryshme.
Ministrja Rizvanolli ka thënë se “është e rëndësishme që të gjithë qytetarët të kenë qasje në shërbime cilësore dhe në kushte të barabarta”.
“Aktualisht janë nëntë pika të Postës në katër komunat veriore, duke përfshirë në të gjitha komunat që ka sportele, por edhe zyra të veçanta postare si në Banjskë dhe të tjera”, ka thënë ajo.
Ndërsa, ministri i Administrimit dhe Pushtetit Lokal, Elbert Krasniqi ka thënë se shkurt se ekzekutivi i vendit do të vazhdojë me aktivitete të tjera që t’ua lehtësojë jetën qytetarëve.
E menjëherë pas hapjes së kësaj pike qytetarët kanë filluar të marrin shërbime.
