Një përditësim teknik i bërë nga një kompani e huaj kibernetike, është bërë shkak për një kolaps kibernetik, i cili ka përfshirë disa sektorë në shumë vende të botës, përfshirë këtu edhe Kosovën.
Gjatë ditës qytetarët nuk kanë mundur të marrin shërbime online prej disa bankave që operojnë në vend.
Për problemet në sistem, me njoftim dolën nga Banka Qendrore e Kosovës.
“BQK bën me dije se nuk ka pasur sulme kibernetike në sistemin bankar dhe nuk ka pasur asnjë rrezik për të dhënat apo sistemet. Si pasojë e disa ndryshimeve teknike të aplikuara nga ofrues global të shërbimeve, disa nga shërbimet online janë kufizuar për një kohë të caktuar. Sistemi bankar është funksional dhe nuk ka asnjë arsye për shqetësim. Shërbimet bankare po ofrohen nga bankat përmes kanaleve të tyre fizike dhe digjitale”, është bërë e ditur nga Banka Qendrore e Kosovës.
Gjatë së premtes ra edhe sistemi i IT-së në Kompaninë Kosovare për Furnizim me Energji Elektrike, për çka u shkaktuan vonesa në procedimin e kërkesave të qytetarëve.
“Për shkak të një kolapsi kibernetik, i cili ka prekur shumë sektorë në shumë vende të botës, ka afektuar edhe Kosovën, ku nga mëngjesi i sotëm, të gjitha kërkesat tuaja po hasin në vështirësi t’i procesojmë te departamentet përkatëse për shkak të rënies së sistemit të IT-së. Sistemi i Sigurisë Kibernetike “Crowwstrike Global” ka lajmëruar opinionin e gjerë për një gabim në sistemin e tyre. Rrjedhimisht, ky problem nuk është specifik në KESCO, por është problem që ka afektuar të gjitha kompanitë e mëdha globale”.
Për shkak të problemeve në sistem, mijëra fluturime u anuluan anekënd botës.
Mirëpo, nga Aeroporti i Prishtinës i thanë RTK-së se nuk janë afektuar nga këto probleme.
Kompania amerikane njoftoi se është duke punuar për ta rikthyer sistemin.
