Sot në moshen 90 vjeçare ka vdekur humanistja e madhe nga Austria motra e nderit, Johanna Schëab.
E njohur si “Motra Johana” humanistja austriake ka lënë gjurmë të pashlyeshme në gjithë Komunën e Suharekës ku ndihmat që kanë kaluar përmes saj kanë prekur pothuajse çdo fshat të Komunës së Suharekës.
Lajmin e bëri të ditur afaristi nga Suhareka Xhevat Muqa i cili ka thënë se “sot mora një lajm shumë të hidhur nga Austria për vdekjen e Humanistes së madhe siç e njohim ne si Motra Johana. Për punen dhe veprat e saj per vendin tonë sidomos në Suhareke për dy dekada e dini ju qytetar të nderuar”
Xhevat Muqa muaj më parë e kishte vizituar motren Johana në vendlindjen e saj e cila ishte në gjendje jo të mirë shëndetësore.
Muqa për KosovaNews ka thënë se nesër do të udhëtoj për në Austri së bashku me disa anëtarë të Kuvenndit Komunal të Suharekës dhe drejtorin i Shkollës Teknike “Skënder Luarasi” për të marrë pjesë në varrimin e saj i cli do të bëhet të enjten në ora 14.
Vlen të theksohet se qysh nga paslufta Motra Johana ka ndërtuar shumë shtëpi për familjet e varfëra në rajonin e Suharekës por jo vetëm kaq.
Ndihmat e motres së nderit nga Austria në Komunen e Suharekës kanë qenë të mëdha sidomos në fushën e arsimit ku përmes saj janë ndërtuar dhe riparuar disa shkolla nëpër fshatrat e Suharekës.
Gjithashtu për vite të tëra në vazhdimësi Motra Johana ka ndihmuar shumë shkolla duke i funksionalizuar kabinetet të ndryshme me paisje të nevojshme shkollore.
Zemra e madhe e motres Johana tashmë ka pushuar së rrahuri por ajo ka mbetur në zemrat e shumë banorëve të Suharekës e cila ju qëndroi pranë në kohët e vështira.
