Komisioni Qendror i Zgjedhjeve (KQZ) ka filluar përgatitjet e para për zgjedhjet e ardhshme për Kuvendin e Kosovës.
Në mbledhjen e së enjtes, KQZ-ja ka marrë vendim për miratimin e specifikave për furnizim me kamera që do të përdoren në vendvotime për zgjedhjet e ardhshme në Republikën e Kosovës.
Shuma e përgjithshme e planifikuar për këtë aktivitet prokurimi, sipas KQZ-së, është 1 milion euro.
Për herë të parë, KQZ përdori kamerat në vendvotime në procesin për apo kundër largimit të kryetarëve nga funksioni i tyre në komunat Leposaviq, Zubin Potok, Zveçan dhe Mitrovicë e Veriut, i cili u mbajt më 21 prill 2024.
Këto kamera, KQZ i kishte huazuar nga KQZ e Shqipërisë.
Anëtari nga radhët e PDK-së, Arianit Elshani, ka thënë se vendosja e kamerave në vendvotime, sipas KQZ-së, ka për qëllim ruajtjen e integritet të procesit zgjedhor.
Ndërsa, anëtari i KQZ-së nga radhët e VV, Sami Kurteshi, ngriti për diskutim çështjen nëse mund të bëhet ky furnizim nëse zgjedhjet mbahen së shpejti.
Sipas shpjegimeve që u dhanë në këtë mbledhje, kjo është një procedurë e rregullt prokurimi dhe do të ishte e pamundur që ky proces të përmbyllet deri në muajin korrik.
“Këto kamera nuk mundet me u kontratu për kaq një kohë të shpejtë, a janë më të mira të Shqipërisë, janë më të reja, për këtë mund të garantoj”, ka thënë Elshani i PDK-së, transmeton EO.
Në rast të pamundësisë që KQZ të arrijë të sigurojë me kohë kamerat për vendvotime, anëtari tjetër i Vetëvendosjes në KQZ, Alban Krasniqi, ka theksuar se sërish mund t’i drejtohen KQZ së Shqipërisë për huazimin e kamerave.
“Në këtë rast mendoj që mund të drejtohemi Republikës së Shqipërisë, Komisionit Qendror atje që të në vërë në dispozicion kamerat që i kanë e që i përdorin në proceset zgjedhore, nëse veç kjo paraqitet e nevojshme”, ka deklaruar ai.
Tema e zgjedhjeve të ardhshme u diskutua edhe gjatë shqyrtimit të agjendës për punëtorinë për mësimet e nxëna për procesin e votimit për apo kundër largimit të kryetarëve të komunave në Leposaviq, Zveçan, Zubin Potok dhe Mitrovicë e Veriut dhe përgatitjet për zgjedhjet për Kuvendin e Kosovës.
Në pjesën tjetër të mbledhjes, KQZ mori vendim për regjistrimin e iniciativës politike Romani Inicyativa si parti politike, e cila tani do të jetë pjesë e regjistrit të partive politike në Republikën e Kosovës.
Sipas këtij regjistri, numri i partive politike të regjistruara është 52.
Po në këtë mbledhje, KQZ mori vendim për zhvillimin e takimeve të veçanta me kryetarë të komunave dhe me kryesues të Kuvendeve Komunale për të diskutuar dhe bashkëpunuar lidhur me zbatimin e Ligjit për Zgjedhjet e Përgjithshme.
