Bashkimi Demokratik Kroat (HDZ) të mërkurën ka arritur marrëveshje me Lëvizjen për Atdheun për formimin e shumicës së re parlamentare dhe qeverisë së ardhshme, e cila do të udhëhiqet sërish nga kryetari i HDZ-së, Andrej Plenkoviq, raporton “Index”.
“Propozimi i marrëveshjes së arritur sot do t’u prezantohet organeve partiake dhe më pas do ta informojmë opinionin për të gjitha detajet”, ka thënë zëdhënësi i qeverisë, Marko Miliq nga HDZ-ja, pas takimit të ekipeve negociatore të dy palëve.
Siç ishte paralajmëruar edhe më parë, Plenkoviqin do ta përkrahin edhe një pjesë e përfaqësuesve të pakicave kombëtare, në mënyrë që të sigurojë 76 votat e nevojshme në parlament.
Plenkoviqi është kryeministër i Kroacisë nga viti 2016.
Partia e Pavarur Demokratike Serbe (SDSS) s’do të jetë pjesë e koalicionit, siç ishte në mandatin e fundit të Plenkoviqit.
Lëvizja për Atdheun e kushtëzoi mbështetjen ndaj HDZ-së që SDSS-ja të mos ishte pjesë e shumicës parlamentare apo e qeverisë së ardhshme.
Në zgjedhjet parlamentare të 17 prillit, asnjë parti nuk fitoi mandate të mjaftueshme për të formuar Qeverinë.
Fituesja e zgjedhjeve, HDZ-ja me prirje të djathtë, mori 61 mandate, tre prej të cilëve janë nga diaspora. Koalicioni i dytë i qendrës së majtë, i mbledhur rreth Partisë Socialdemokrate, ka 42 mandate, dhe Lëvizja për Atdheun ka 14 mandate, ku një deputet thotë se nuk do ta mbështesë HDZ-në.
Ata pasohen nga e djathta Most me 11 mandate dhe partia e majtë e gjelbër Mozemo me 10 mandate. Ka edhe parti më të vogla.
Në Parlamentin kroat ka gjithsej 151 ulëse parlamentare, tetë prej të cilave janë të rezervuara për përfaqësuesit e pakicave kombëtare.
