Prokuroria Themelore në Prishtinë ka dhënë detaje në lidhje me vrasjen e mbrëmshme në rrugën “Jeronim De Rada” në Prishtinë.
Sipas Prokurorisë, një person ka mbetur i vrarë, ndërsa tre tjerë janë plagosur nga të shtënat me armë zjarri.
“Lidhur me rastin e vrasjes së rëndë, ju njoftojmë se prokurori kujdestar nga Departamenti i Krimeve të Rënda ka dalë në vendin e ngjarjes dhe bashkë me njësitet relevante kanë ndërmarrë veprime hetimore në vendin e ngjarjes. Sipas hetimeve preliminare, dyshohet se nga të shtënat me armë zjarri është vrarë një person, ndërsa tre persona të tjerë janë plagosur”, thuhet në përgjigjen e prokurorisë.
Të plagosurit janë duke marrë trajtim mjekësor, teksa njëri prej tyre e ka gjendjen më të rëndë shëndetësore.
Në vendin e ngjarjes janë sekuestruar gëzhoja, veturë e prova të tjera materiale, të cilat do të shërbejnë në procedurën penale, po ashtu po zhvillohen hetime për arrestimin e të dyshuarve.
“Në vendin e ngjarjes janë sekuestruar gëzhoja, veturë e prova të tjera materiale të cilat do të shërbejnë në procedurën penale. Me urdhër të prokurorit trupi i pajetë është dërguar në IML për obduksion, derisa në koordinim me policinë po zhvillohen hetime për arrestimin e të dyshuarve dhe sigurimit të prezencës së të njëjtëve në procedurën penale”, thuhet tutje në përgjigje.
Ndryshe, në raportin 24-orësh të policisë raportohet se nga ky rast ka mbetur një i vrarë dhe një i plagosur.
Gruaja që mbeti e plagosur është në gjendje të rëndë shëndetësore.
Ajo po trajtohet në Klinikën Emergjente në Qendrën Klinike Universitare të Kosovës.
Drejtori i Klinikës Emergjente, Naser Syla, mbrëmë tha se ekipet e Kirurgjisë Vaskulare dhe të Anesteziologjisë janë duke e trajtuar atë në sallë të operacionit.
