Një rast i veçantë dhe sfidues, por që është operuar me sukses në Spitalin e Përgjithshëm në Pejë.
Në fakt, një paciente e moshës 39 vjeçare është operuar me sukses, duke ju larguar një tumor i peshës prej 10 kilogramëve.
Pacientja e diagnostifikuar me tumor të vezorëve për më shumë se 1 vit ka kërkuar shërim në shumë Institucione shëndetësore publike e private, por asnjëri nga këto institucione nuk ka marrë përsipër të kryej intervenimin kirurgjikal për shkak të vlerësimit se tumori është i paevitueshëm.
Spitali i Përgjithshëm i Pejës njofton se si erdhi deri tek vendimi që të trajtohet kjo paciente që kishte probleme të shumta shëndetësore.
“Duke parë gjendjen e pacientes që tumori i shkaktonte probleme të tjera shëndetësore si tromboza në pjesën e ekstremiteteve të poshtme, probleme në organet e tretjes, presion në mushkëri duke i shkaktuar probleme me frymëmarrje dhe probleme me organe të tjera në pjesën abdominale në konsultim me familjarët e pacientes, mjeku që trajtoj rastin Dr.Rifat Dreshaj pas konsultimeve edhe me mjekët e tjerë vendosën që të bëjnë përpjekjen e fundit për këtë paciente që ishte intervenimi kirurgjik”, thuhet në njoftim.
Për më shumë bëhet e ditur se ekipa e mjekëve specialist Dr.Rifat Dreshaj – kirurg, Dr.Ramadan Daci – gjinekolog obstetër, Dr. Gëzim Devolli – kirurg dhe Dr.Besim Kastrati- anasteziolog, së bashku me ekipin e teknikëve të anastezionit dhe instrumentarëve, e kanë kryer me sukses operimin duke larguar në tërësi tumorin dhe ka bërë rekonstruksionin e zorrëve.
Operacioni i pacientes është kryer para një jave, respektivisht me datë 19.07.2022 dhe tashmë pacientja gjendet në kurim në Repartin e Kirurgjisë dhe gjendja e saj është e mirë./KosovaNews/
