Shefi i Grupit parlamentar të Lidhjes Demokratike të Kosovës, Arben Gashi dhe shefja e GP të Lëvizjes Vetëvendosje, Mimoza Kusari-Lila janë përplasur në seancën e sotme ku po diskutohet për kontratat njëburimore.
Kusari-Lila, i ka pyetur partitë opozitare nëse e kanë lexuar para se ta nënshkruajnë kërkesën e seancës.
“Nëse e keni lexuar ju rikujtoj, ekskluzivisht keni shkruar Komisioni për mbikëqyrjen e financave publike në vitin 2022 kishte kërkuar nga ZKA-ja për auditim të performancës për kontratat njëburimore të nënshkruara nga MMPHI-ja”, ka thënë ajo.
Gashi në anën tjetër i është kundërpërgjigjur duke i thënë se ajo po mundohet të bërtasë, por sipas tij, “faktet po bërtasin më shumë”.
“Ne e kemi ftuar qeverinë në seancë për kontratat njëburimore që i ka dhënë qeveria dhe institucionet që derivojnë nga ajo. Interesi ynë si thirrës të kësaj seance është të diskutohet për ato 1805 kontratat. Ideja e thirrjes edhe e shkruar edhe e deklaruar është shqyrtimi i projektrezolutës që ka të bëjë me tenderët njëburimor të dhënë nga Qeveria e kryeministrit Albin Kurti”, ka thënë ai
Kusari-Lila ka thënë se kampion për kontratat njëburimore janë qeveritë e kaluara.
“Arben është e vërtetë që faktet flasin shumë më fortë. Kur me fol për formën e qeverisjes nisu prej shtëpisë tënde. Kampion në kontratat njëburimore është qeveria e vitit 2008 dhe pason ajo e vitit 2015. Me krejt çfarë po mundoheni, hala as për së afërmi nuk është e krahasueshme. Sot nuk keni asnjë argument”, ka thënë ajo.
Deputetja e LDK-së, Hykmete Bajrami, ka thënë se deputetët mund të thërrasin sa herë të duan seancë derisa i mbledhin 40 nënshkrime. Ajo ka shtuar se sa ka qenë ajo në ministri, asnjë tender njëburimor nuk e ka nënshkruar.
“Shumë po ju pengon kjo seancë. Zonja Kusari me qenë e aftë i kishe thirrë të rregullta e s’të kishin pengu seancat tona. I kemi 40 nënshkrime dhe sa herë të na teket kemi me thirrë në përgjegjësi këtu. Ai ministri që iku që mundohet me u tregu i pastër, a e dini kur ia ka ndërruar vendin drejtorit të prokurimit kur thesari amerikan e ka shti në liste të zezë. Këta jeni ju, kur thesari amerikan e ka fut në listë të zezë atë babën e tenderëve që e quanin për qeverinë PAN. Ky është ministri që në qeverinë e tij dy vetë nënshkruajnë tenderë, Hysen Durmishi dhe Liburn Aliu, për shkak se kanë me e nda tallin. E kur flasim për kontrata të qeverive të kaluara përmendni me emra. Unë kam qenë në tri ministri asnjë tender burimor nuk e kam nënshkru. Andaj ju jeni të korruptum, frikacakë dhe shpifsa”, ka thënë Bajrami.
E, kryetari i AAK-së, Ramush Haradinaj, është shprehur se duhet të hapet hetim mbi këta tenderë.
“Shumë herët e kam diskutuar lidhjen e shkurtë të korrupsionit. Ju lutem shiheni rezultatin ku keni mbërri. Mund të arsyetohet një kontratë në ndonjë situatë të caktuar. Por fenomeni ju turpëron ju marron. Atëherë nëse nuk doni ta votoni rezolutën ju lutem ta keni guximin ftojeni hetuesinë”, ka thënë Haradinaj.
