Pas rastit të djegies së lokaleve të saj, nënkryetarja e Zveçanit, Natasha Tomaniq ka theksuar dyshimet e saj se akti mund të ketë qenë përgjegjësi i Listës Serbe ose “Brigada e Veriut”.
Ajo ka shtuar se kjo nuk e frikëson, dhe nuk do e ndal punën e saj si nënkryetare madje do te punoj që këto objekte t’i ndërtoj edhe më të mëdha sesa që janë.
Ajo ka thënë se Lista Serbe dhe Brigada Veriore janë ata që kundërshtojnë përpjekjet e serbëve për të punuar në institucionet e Kosovës.
“Është e çuditshme si Lista Serbe kundërshtojnë punën në institucionet kosovare kur janë ata vet që po bëjnë thirrje që të bëhen pjesë e këtyre institucioneve”, ka thënë ajo.
Policia e Kosovës ka njoftuar se persona të panjohur i kanë vënë zjarrin dy lokaleve të zëvendëskryetares së Komunës së Zveçanit, Natasha Tomaniq.
Rasti ka ndodhur në orët e para të së premtes.
Sipas raportit 24-orësh të Policisë, Tomanic dyshon se zjarri i është vënë qëllimshëm nga persona të dyshuar.
Po ashtu, lidhur me këtë, zëvendësministri i Ministrisë së Administrimit dhe Pushtetit Lokal, Arbër Vokrri, ka thënë se “ky rast është një përpjekje e kotë për të frikësuar serbët e liruar nga kthetrat e terroristëve të Listës Serbe”.
