Emisari i Bashkimit Evropian për dialogun, Miroslav Lajçak, ka bërë të ditur së është takuar me presidenten Vjosa Osmani me të cilën ka biseduar për zhvillimet e fundit në dialog, në veçanti zgjedhjet në veri të Kosovës dhe takimin e fundit Kosovë-Serbi në Bruksel.
Osmani dhe Lajçaku janë takuar në Antalia, në margjina të Forumit Diplomatik. Lajçaku e ka cilësuar të dobishme bisedën me Osmanin.
“Diskutuam për zhvillimet e fundit në dialog, në veçanti për zgjedhjet në veri të Kosovës dhe takimin e fundit që e mbajtëm në Bruksel”, ka shkruar ai në X.
Ditë më parë në Bruksel, Lajçaku u takua me përfaqësues financiarë të Kosovës dhe të Serbisë për të diskutuar për çështjen e Rregullores së Kosovës për paratë e gatshme, që përjashton dinarin serb.
Pas këtij takimi Lajçak, ka thënë se do të ketë nevojë për takime të tjera për të zgjidhur çështjen e Rregullores së Bankës Qendrore të Kosovës.
