Këshilli për Mbrojtjen e të Drejtave dhe Lirive të Njeriut (KMDLNJ) ka thënë se një numër i konsiderueshëm i të burgosurve mbahen në kundërshtim të plotë me të drejtat e njeriut, e sipas këtij institucioni, për shkak të mungesës së kushteve, iu mohohet e drejta për trajtim të duhur shëndetësor.
KMDLNJ-ja ka thënë të martën se është shqetësuese vdekja e të burgosurit H.M., që ndodhi të hënën (12 shkurt), duke shtuar se s’kishte marrë trajtim të duhur për problemet e rënduara.
“KMDLNj-nja e rikujton opinionin se në institucionet e mbajtjes në Kosovë një numër i konsiderueshëm i të burgosurve mbahen në kundërshtim të plotë me të drejtat e njeriut shkaku se vuajnë nga sëmundje të pashërueshme apo kanë çrregullime të rënda të shëndetit mendor prandaj kërkojnë mbikëqyrje 24-orëshe apo të pjesshme”, thuhet në komunikatën për media.
Sipas Këshillit, i burgosuri kishte probleme të rënduara shëndetësore, por gjyqtari i rastit, ndonëse u tha se ishte i njohur, s’kishte kthyer përgjigje.
KMDLNj-ja ka kërkuar hetim profesional mbi rastin e tij, duke shtuar se deputetët e Kuvendit të Kosovës duhet të kërkojnë formimin e një komisioni hetimor për vdekjet dhe vetëvrasjet e të burgosurve, “sikur edhe të mos e votojnë marrëveshjen për burgje me Danimarkën”.
“Në kohën kur të burgosurit kosovarë vdesin apo vetëvriten për mungesë të trajtimit të duhur shëndetësorë, në Burgun e Gjilanit po bëhen renovime me të cilat përkujdesja shëndetësore për të burgosurit jodanezë që do të blihen nga Danimarka, do të jetë sipas standardeve të Danimarkës. Çfarë diskriminimi”, thuhet tutje në reagim.
