Komuna e Prishtinës ka bërë të ditur se deri më tani kanë trajtuar 3356 qen endacakë.
“Kryeqyteti ka arritur një hap të madh në kujdesin për qenët endacakë. Deri më tani, kemi trajtuar 3356 qenë endacakë , duke i kapur, sterilizuar, kastruar, vaksinuar dhe pajisur me mikroçip për një mbikëqyrje më të mirë”, thuhet në njoftimin e Komunës së Prishtinës.
Bëhet e ditur se ky proces është realizuar në bashkëpunim me katër operatorë ekonomikë, që çdo qen të trajtohet me kujdesin që meriton .
“Vetëm nga janari deri në maj të vitit 2022, kemi trajtuar 709 qenë, duke treguar angazhimin tonë të qëndrueshëm për një mjedis më të mirë dhe më të sigurt për të gjithë, përfshirë miqtë tanë me katër këmbë”, thuhet në komunikatë.
Ndryshe Komuna në Prishtinës ka ndërmarrë disa veprime për trajtimin e qenve endacakë, duke përfshirë edhe subvencionimin e qytetarëve që janë të interesuar t’i adoptojnë.
