Kryetari i Federatës së Futbollit të Kosovës, Agim Ademi, është shprehur optimist sa i kalon kalimit të grupit në edicionin e ri të Ligës së Kombeve.
Sonte në Paris është hedhur shorti dhe Kosova do të jetë pjesë e Grupit 2 në Ligën C së bashku me Rumaninë, Qipron dhe fituesin e ndeshjes Lituania-Gjibraltari.
Ademi e ka quajtur shortin jo të keq po edhe jo të lehtë.
“Besoj në vendin e parë pasi i njohim shume mirë kundërshtarët si Rumania dhe Qipro. Përzgjedhësi i ri do të bëhet i ditur shumë shpejt dhe besoj se do ta kalojmë grupin”, ka thënë ai për emisionin specal të “Radio Kosovës” pas shortit.
Gjithashtu Ademi, duke folur për faqen e FFK-së, ka uruar që Kosova të ketë sa më pak lëndime dhe ekipi të jetë ekipin standard gjatë këtij edicioni. “Duke pasur parasysh formën e futbollistëve dhe suksesin që ata po e tregojnë me ekipet e tyre jam optimist. Shpresoj që atë formë të mirë nga klubet ata ta transferojnë edhe në ekipin kombëtar dhe të dalim triumfues. Besoj në ekipin tonë dhe është mirë që para fillimit të edicionit të Ligës së Kombeve do t’i kemi katër ndeshje miqësore, në të cilat trajneri ynë i ardhshëm do të ketë mundësi ta krijojë ekipin që do të jetë fitues i këtij grupi”, është shprehur ai. “Uroj që kjo të ndodhë dhe të ecim tutje në një rang më të lartë”.
Ndërsa ish-portieri i Kombëtares, tani në rolin e zv/drejtorit, Samir Ujkani e ka vlerësuar shortin korrekt. “Është një grup korrekt. E kemi prap kundërshtare Rumaninë, me të cilën u përballëm së fundmi edhe në kualifikimet për Euro 2024. Po ashtu, edhe Qipro është një Kombëtare me të cilën jemi ndeshur dhe e njohim mirë, ndërsa Lituani/Gjibraltar do ta shikojmë se cila do të jetë pjesë e grupit dhe më pas e analizojmë. Gjithsesi ne duhet të shikojmë vetëm veten dhe të kemi besim tek ekipi. Duhet të punojmë të gjithë bashkë për suksesin dhe të dalim të parët në këtë grup”, ka theksuar Ujkani.
