Është ndërprerë greva e punëtorëve teknik të 14 shkollave të kryeqytetit, pas marrëveshjes së kryetarit të sindikatës, Jusuf Azemi me nënkryetaren dhe u.d. drejtoren e arsimit, Jehona Lushaku.
“Si rezultat i kësaj marrëveshjeje, është vendosur që greva e punëtorëve të mirëmbajtjes të ndërpritet, duke lejuar që shkollat të funksionojnë normalisht dhe të sigurojnë një mjedis të sigurt dhe të pastër për nxënësit e kryeqytetit. Nënkryetarja e kryeqytetit dhe kryetari i sindikatës shprehin falënderimin e tyre për të gjithë punëtorët për durimin dhe angazhimin e tyre gjatë kësaj periudhe të sfidave”, thuhet në njoftimin e komunës.
Nënkryetarja Lushaku ka njoftuar se është bërë ngritja e pagave të kësaj kategorie. “Me urgjencë kam trajtuar çështjen e grevës së punëtorëve teknik në objektet shkollore të kryeqytetit. Me këtë rast pas takimit me kryetarin e Sindikatës së Punëtorëve të Sektorit Privat, Jusuf Azemi, u pajtuam për ndërprerje të grevës nga nesër, meqë kërkesa e tyre është plotësuar. U dakorduam që të plotësohen kushtet e kërkuara, ku përfshihet rritja e pagave” – deklaroi nënkryetarja Lushaku.
Punëtorët teknik të shkollave të Prishtinës në fillim të grevës kishin njoftuar se në rast të shpërfilljes së kërkesave të tyre, do të lëshojnë vendet e tyre të punës
