Komisioni i Pavarur për Media dje me një vendim të befasishëm dhe të pa paralajmëruar duke mos qenë as pjesë e rendit të ditës mori vendim që t’i lejojë operatorit Artmotion transmetimin e kanaleve të “Arena” të Telekomit të Serbisë, kanale këto që ishin të ndaluara me vendim të KPM-së.
Ndërkohë këtij vendimi të KPM-së i është gëzuar kryeshefi ekzekutiv i “Telekom Serbia”, Vladimir Luçiq ai është shprehur i kënaqur me vendimin e Komisionit të Pavarur të Mediave në Kosovë për kthimin e kanaleve sportive “Arena”.
“Lajmi i madh dhe i rëndësishëm është se arritëm që kanalet sportive Arena sërish të transmetohen në Kosovë dhe besoj se kjo është vetëm një fillim për uljen e presionit mbi operacionet e Telekom Srbija, që do të rezultojë me rezultat pozitiv për kompaninë tonë” – ka thënë Luçiq në një prononocim për mediumin kosovo-online media kjo e cila kontrollohet nga presidenti i Serbisë Aleksandër Vuçiq.
Në mbledhjen e djeshme të Komisionit të Pavarur për Media (KPM) pas kërkesës së operatorit Artmotion bërë një ditë më parë ka shfuqizuar vendimin e marrë më 3 tetor të vitit 2023, përmes të cilit kishte pezulluar kanalet sportive të “Arena”, pasi në to ishte shfaqur propaganda e Serbisë duke shfaqur mesazhe e thirrje mbështetëse për terroristët e vrarë më 24 shtator 2023 në Banjskë.
Ky vendim i KPM-së ishte ankimuar në Gjykatën Komerciale pas ankesës që kishte bërë operatori Artmotion por gjykata ia kishte hedhur poshtë ankesën e Artmotion në të dy shkallët e Gjykatës Komerciale duke i dhënë të drejtë KPM-së në vendimin e saj.
Më 6 shkurt, vetë KPM-ja e shfuqizoi vendimin e saj, duke i kthyer kanalet sportive “Arena”, ndërkohë sot KPM doli me njoftimin zyrtar duke u arsyetuar se kanë ndryshuar rrethanat e këtij rasti, duke përmendur kërkimfaljen nga operatori, garancinë se nuk do të përsëritet më një gjë e tillë dhe “është marrë mësimi i duhur.
4 anëtarët që votuan pro në mënyrë unanime kundrejt kërkesës së Artmotion janë; kryetari Jeton Mehmeti dhe anëtarët, Besnik Berisha, Fatih Basha dhe Fitim Veliu.
KosovaNews gjatë ditës së sotme ka dërguar pyetje në KPM-së për ta kuptuar arsyet e nxitimit të këtij vendimi pas kërkesës së bërë nga operatori Art Motion vetëm një ditë më parë pra me 5 shkurt 2024.
Gjithashtu kemi kërkuar të dimë se kur dhe kujt i ka kërkuar falje operatori Art Motion duke qenë se kjo kërkim falje nuk është parë askund në opinionin publik?!
