Shqipëria është përfshirë nga reshjet e borës në pothuajse gjithë vendin.
Gjendja më e rënduar është në Fushë Arrëz që ka shpallur gjendje të jashtëzakonshme për shkak të reshjeve të mëdha të borës.
“Bashkia Fushë-Arrëz do të bëj të pamundurën për t’ju gjendur pranë banoreve me të gjithëve Njësitë Administrative, Iballe, Blerim, Fierze, Qafë-Mali. Po koordinojmë punën me Emergjencat Civile Kombëtare për të përballuar situatën”, ka shkruar në rrjetet sociale kryetari i Bashkisë, Hil Curri.
Ditën e sotme moti në zonat juglindore dhe veri të Shqipërisë është përkeqësuar ku janë shtuar reshjet e dëborës. Autoritetet kanë apeluar që shoferët të bëjnë kujdes të shtuar në rrugë, ndërsa qytetarët të evitojnë daljet e panevojshme.
Si pasojë e reshjeve të dendura të dëborës, rruga në Qafë Murrizë është bllokuar. Policia në Shqipëri njoftoi se po punojnë për hapjen e aksit dhe se lëvizja nga Peshkopia drejt Tiranës do të kryhet nga aksi i vjetër.
“Qarku i Dibrës është përfshirë nga reshje të dendura dëbore duke krijuar vështirësi në qarkullimin e mjeteve. Si pasojë, aksi rrugor bypass Qafë Murrizë, është bllokuar. Borëpastrueset po punojnë për hapjen e aksit dhe lëvizja e mjeteve në drejtim të Tiranës do të kryhet nga aksi i vjetër Klos-Burrel-Shkopet”, thuhet në njoftimin e Policisë.
Si pasojë e reshjeve të dëborës, Komisariati i Policisë Rrugore në Tiranë njoftoi se nuk do të lejojë të kalojnë në Rrugën e Arbrit automjete pa goma dimërore dhe pa zinxhirë.
Gjendja e rënduar pas reshjeve është edhe në Bashkinë e Lezhës ku banorëve iu është bërë thirrje që të mos dalin nga shtëpia nëse nuk e kanë të nevojshme.
“Të nderuar banorë të Lezhës, për shkak të situatës së krijuar nga moti si dhe reshjet e dëborës me intensitet të ulët ju ftojmë të bëni kujdes sidomos drejtuesit e automjeteve. Të marrin masa për përdorimin e zinxhirëve si dhe ftojmë të gjithë banorët të shmangin daljet e pa nevojshme”, thuhet në njoftimin e Bashkisë.
Autoriteti Rrugor Shqiptar ka bërë të ditur se në aksin rrugor Skuraj-Burrel ka pasur rënie gurësh si pasojë e reshjeve të shiut, por megjithatë rrugët janë të pastruara dhe të kalueshme.
Në njoftimin e ARRSH-s thuhet se në zonën veriore të Shqipërisë ka reshje dëbore me intensitet dhe erë në rrugët Ura e Zapodit-Shishtavec në Tamarë-Vermosh, në Qafë Thore-Bogë, Klos, Peshkopi, Bajram Curri-Fierzë, në Tropojë.
Sipas ARRSH, mjetet borëpastruese dhe punëtorët e mirëmbajtjes kanë qenë në terren pa ndërprerje dhe rrugët janë pastruar nga dëbora dhe qarkullimi vijon pa probleme.
“Mjetet borëpastruse dhe punëtorët e mirëmbajtjes kanë qenë në terren pa ndërprerje. Rrugët janë të pastruara nga dëbora dhe qarkullimi vijon pa probleme”, njoftoi ARRSH.
