Komuna e Rahovecit do të subvencionojë me nga 500 euro çdo grua që lindë në Qendrën Kryesore të Mjekësisë Familjare “Dr. Fahredin Hoti”.
Kështu ka bërë të ditur kryetari i kësaj komune, Smajl Latifi, i cili ka njoftuar se vendimin e ka nënshkruar këtë të martë.
Teksa ka dhënë njoftimin, Latifi ka thënë se ka përmbushur edhe një zotim publik.
“Sot, nënshkrova vendimin e parë të subvencionimit të lindjeve në Qendrën Kryesore të Mjekësisë Familjare (QKMF) ‘Dr. Fahredin Hoti’ në Rahovec”, ka shkruar Latifi në Facebook.
Ai tutje ka bërë të ditur se vendimi do të zbatohet për periudhën nga janari i këtij viti.
“Nga janari i këtij viti, çdo lindje në Repartin e Maternitetit të QKMF-së ‘Dr. Fahredin Hoti’, do të mbështetet me 500€ nga Komuna e Rahovecit”, ka shtuar i pari i Rahovecit.
