Ministri i Bujqësisë, Pylltartisë dhe Zhvillimit Rural, Faton Peci, ka thënë se objekti i ri i MBPZhR-së po jetësohet dhe ndërtimi i tij do të fillojë në vitin 2024. Sipas Pecit, objekti do të jetë në harmoni me normat bashkëkohore për objekte shtetërore në përputhje me standardet evropiane dhe hapësira të planifikuara fleksibile për punë.
Sipas tij, ai do të shërbejë edhe si një vend relaksimi për qytetarët si dhe si hapësirë e përshtatshme për ta prezantuar dhe ruajtur biodiversitetin natyror të vendit tonë.
“Objekti i ri i MBPZhR-së po jetësohet!
I planifikuar në harmoni me normat bashkëkohore për objekte shtetërore në përputhje me standardet evropiane dhe hapësira të planifikuara fleksibile për punë.
Përdorimi i materialeve të qëndrueshme inovative dhe dizajni që respekton normat mjedisore për eficiencë të energjisë dhe burime të rinovueshme, sikurse panelet solare dhe fasada gjelbruese në front të objektit e bëjnë këtë objekt jo vetëm efiçient, por edhe miqësor ndaj mjedisit urban”, ka thënë Peci.
Sipas tij, përtej kësaj, në anën lindore të lokacionit është paraparë një kopsht botanik, ku mund të prezantohen shembuj të florës vendore.
“Kjo shërben edhe si një vend relaksimi për qytetarët si dhe si hapësirë e përshtatshme për ta prezantuar dhe ruajtur biodiversitetin natyror të vendit tonë.
Ndërtimi i objektit do të fillojë në vitin 2024”, ka thënë ministri Peci.
