Kryesuesi i Këshillit Prokurorial të Kosovës (KPK), Jetish Maloku është pyetur në konferencën e fundit për këtë vit edhe për mos-dekretimin e Blerim Isufaj për kryeprokuror të shtetit.
Në këtë rast Maloku tha se KPK e ka bërë punën e tij, ndërsa sipas tij ka dështuar Zyra e Presidentes.
“Nuk mendoj se këshilli ka dështuar, por ka dështuar Zyra e Presidentes. Ne kemi edhe një opinion të Komisionit të Venecias. Këshillat kanë rol përmbajtjesor, e roli i presidentit është formal, pra dekretimi. Shtyrja që ka bërë presidentja, është dështim i zyrës së saj, e ka mbajt më shumë se 1 vit e gjysmë pezull dekretimin”, ka thënë Maloku.
Maloku ka thënë se Këshilli është përballe me sfida, por ka shënuar edhe rezultate për gjatë 12 muajve punë.
“Gjate këtij viti Këshilli Prokurorial ka marrë 190 vendime, që kanë shërbyer për realizimin e mandatit kushtetues të këshillit dhe sistemit prokuroria”, ka thënë ai në konferencën përmbyllëse për viti 2023.
Kujtojmë se e para e shtetit, Vjosa Osmani doli rreth dy muaj më parë në një konferencë për media dhe tregoi se nuk e ka dekretuar Blerim Isufajn për Kryeprokuror të Shtetit.
Ajo tha se këtë vendim e mori pas shqyrtimit të ankesave të shumta nëpër gjykata.
Osmani ka theksuar se procesi për Kryeprokuror është përcjell me shumë parregullsi dhe me shumë shkelje procedurale.
Në përkrahje të vendimit të presidentes Vjosa Osmani kanë dalë edhe organizata joqeveritare që monitorojnë sistemimin e drejtësisë së Kosovës, Zyra e BE-së në Kosovë, ambasadorë të shumtë nga vendet e QUINT-it. Ata kanë kërkuar që ky proces me të drejtë duhet anuluar dhe në përsëritjen e tij KPK nuk duhet të bëj shkelje të tilla.
