Ndërmarrja Publike “Prishtina Parking” ka arritur që brenda një dite të grumbullojë afërsisht 10 mijë euro vetëm nga SMS-të për pagesën e parkingjeve, pa llogaritur këtu edhe gjobat që vënë gjatë ditës.
Sipas njoftimit të “Prishtina Parking”, mbrëmë është arritur numri rekord i SMS-ve të dërguara për pagesën e parkingjeve në Zonën 1 dhe 2.
Vetëm gjatë 24 orëve të fundit, “Prishtina Parking” ka pranuar rreth 7035 mesazhe. 1678 prej tyre ishin për pagesë në Zonën 1, ndërkaq 5353 SMS thuhet të jenë dërguar për pagesën e parkingut në Zonën 2.
“Prishtina Parking” ka njoftuar se ka rritje të konsumatorëve krahasuar me ditët e kaluara.
Një orë parkingu në Zonën 1 kushton 1 euro, ndërkaq Zona 2 është 0.50 centi ora.
Një veturë mund të parkohet për maksimum 180 minuta në një zonë të caktuar.
Lidhur me gjobat e vendosura nga kjo ndërmarrje ditë më parë është marrë vendimi për ndryshimin e rregullores së saj.
Rregullorja e re nuk parasheh më gjoba standarde për personat që parkojnë automjetet e tyre në parkingjet e menaxhuara nga ndërmarrja dhe nuk kryejnë pagesë. Në vend të saj, shoferët do të detyrohen të paguajnë një biletë 24-orëshe dhe gjithashtu do t’u vendoset edhe bllokada në rrota.
Kjo biletë do të vlejë më pas për 24 orët e ardhshme për të gjitha parkingjet e menaxhuara nga “Prishtina Parking” dhe kushton 20 euro.
Ndërmarrja “Prishtina Parking” është njëra prej ndërmarrjeve më të diskutueshme lidhur me operimin e tyre në kryeqytet.
Ajo ishte kritikuar tej mase nga banorët rezidentë për mënyrën e funksionimit të saj dhe çmimet e larta.
Kjo ndërmarrje ka çmime astronomike sidomos për gjithë ata që nuk janë banues të përhershëm në Prishtinë, por që punojnë në kryeqytet.
Qytetarët e tillë edhe pse punojnë në kryeqytet, detyrohen që për parkingun e veturës së tyre të paguajnë nga 70 euro në muaj, apo nëse bëjnë pagesë për një vit kushton 700 euro.
Këto çmime në krahasim me të ardhurat e punëtorëve, janë konsideruar si astronomike dhe nuk ka vend tjetër që ka këso taksash.
Ndërmarrja “Prishtina Parking” përveç çmimeve të larta shpesh herë është kritikuar nga opozita në kryeqytet edhe për mbushjen e saj me punëtorë që kanë lidhje partiake me LDK-në.
Për punësimet partiake në këtë ndërmarrje ka raportuar edhe KosovaNews.
LEXO më shumë:
