Drejtori i Përgjithshëm i Policisë së Kosovës, Gazmend Hoxha ka folur për ngritjen e nivelit të sigurisë në trafikun rrugor dhe parandalimin e aksidenteve.
Ai në një konferencë për media tha se Policia e Kosovës respektivisht Divizioni i Komunikacionit Rrugor për objektiv kryesor ka ngritjen e nivelit të sigurisë në trafikun rrugor dhe parandalimin e aksidenteve.
Hoxha tha se tashmë kanë filluar që të përdorin kamerat e trupit për zyrtarë policor të njësive të trafikut.
“Me qëllim të përmbushjes së Planit Zhvillimor Strategjik të PK-së 2021-2025 ku një ndër objektivat parasheh modernizimin e pajisjeve për kontroll dhe mbikëqyrje të trafikut rrugor jemi furnizuar me vetura me pajisje inteligjente ’smart patroll’, radar mobil që dëshmojnë kundërvajtjet në trafik, e po ashtu në të ardhmen synojmë të pajisemi me radar statik, pajisje për lëshimin e gjobave në mënyrë elektronike si dhe për një transparencë më të madhe të punës policore ndaj publikut kemi filluar përdorimin e kamerave të trupit për zyrtarë policorë të njësive të trafikut”, ka thënë Hoxha.
Gjatë konferencës Hoxha shpalosi numrin e aksidenteve të këtij viti në krahasim me vitin e kaluar, 2022.
Sipas tij, këtë vit numri i aksidenteve me fatalitet është 104 persona.
“Vitin e kaluar kemi pas 95 aksidente me fatalitet e sivjet i kemi 94 me këtë aksident që ndodhi mbrëmë. Persona të vdekur vitin e kaluar ka qenë 106, ndërsa këtë vit 104 me rastin e djeshëm”, ka thënë Hoxha.
Po ashtu Hoxha theksoi se janë duke synuar që në të ardhmen të vendosin kamera në autostrada
“Kemi miratuar një plan të ri operativ duke ashpërsuar masat dhe punën në angazhimin për mbikëqyrje në trafik. Kemi bërë kërkesë të Ministria e Infrastrukturës që të pajisemi me radar dhe synojmë që të në ardhmen të vendosim dhe kamera që do të monitorojnë autostradat tona”, ka thënë tutje Hoxha.
