Sindikata e Policisë së Kosovës ka mbajtur mbledhjen e Këshillit Drejtues, ku është diskutuar për protestën e përbashkët me Njësinë Speciale Operative (NjSI) dhe njësitë e tjera të mbajtur të shtunën e 9 dhjetorit.
Në këtë takim sipas njoftimit u vlerësua se protesta është menaxhuar mirë dhe e ka arritur efektin e vet me kërkesat e paraqitura.
Në komunikatën e lëshuar bëhet me dije se deri në janar të vitit të ardhshëm nuk do të ketë më ndonjë aktivitet sindikal.
“Ndërsa për hapat tjerë, Këshilli Drejtues vendosi që në muajin Janar të vitit të ardhshëm të mbahet një takim i Këshillit Drejtues dhe të shikohet se në këtë periudhë kohore, nga protestat e deri në mbledhjen e ardhshme a do të realizohet ndonjë takim në drejtim të dialogut social. Arsyeja e kësaj periudhe kohore është për të dhënë hapësirë për dialog dhe pasi që është fundi i vitit si dhe për shkak të festave që pasojnë nuk mund të realizohet ndonjë aktivitet sindikal”, thuhet në njoftim.
Ndryshe, Njësitë speciale të Policisë së Kosovës kanë protestuar të shtunën pranë ndërtesës së Qeverisë së Kosovës në Prishtinë duke bërë thirrje për përmirësim të përgjithshëm të kushteve të punës dhe duke shpalosur një varg kërkesash tjera.
Kryetari i Sindikatës së Policisë së Kosovës, Imer Zeqiri, kishte thënë gjatë protestës se kërkesat e policisë janë përmirësimi i kushteve të punës si, veshmbathja, mjetet e punës, mjetet logjistike, objektet policore, sigurim jetësor dhe shtesa të përhershme të rrezikshmërisë në punë.
