Asnjëri nga të akuzuarit për vrasjen e trefishtë në Gllogjan, që ndodhi dy vite më parë, nuk e kanë pranuar fajësinë për vrasje.
Kastriot e Kreshnik Mehmetaj, nuk e pranuar asnjërën nga akuzat që rëndojnë për ta, derisa Halil Mehmetaj ka thënë se e pranon fajësinë për armëmbajtje pa leje, por për tjerat jo.
Kreshnik, Kastriot e Halil Mehmetaj akuzohen për Vrasje e rëndë”, “Vrasje e rëndë në bashkëkryerje”, “Shtytje në vrasje të rëndë” dhe “Armëmbajtje pa leje”.
Trupi gjykues ka refuzuar pranimin e fajësisë për armëmbajtje pa leje, me arsyetimin se nuk janë plotësuar kushtet.
Ndryshe, mbrëmjen e 26 nëntorit të vitit 2021 në Gllogjan të Deçanit, një autobus që po transportonte nxënës nga Gjakova për në Deçan, u sulmua me breshëri plumbash nga persona të panjohur.
Si pasojë e kësaj vdiqën tre persona, shoferi i autobusit dhe dy nxënës të moshës 17-vjeçare.
Por disa javë më vonë, Policia arriti të arrestojë të dyshuarit për këtë rast. Kastriot, Kreshnik dhe Halil Mehmetaj, tashmë përballen me akuza për vrasjen e trefishtë që ndodhi dy vjet më parë.
Megjithatë, për këtë rast deri më tash është mbajtur vetëm seanca fillestare gjyqësore, dhe është konfirmuar aktakuza.
Tre të akuzuarit në seancën fillestare janë deklaruar të pafajshëm lidhur me veprat penale “Vrasje e rëndë”, “Vrasje e rëndë në bashkëkryerje”, “Shtytje në vrasje të rëndë” dhe “Armëmbajtje pa leje”.
Sipas aktakuzës së Prokurorisë, cak i vrasjes kishte qenë shoferi i autobusit, tani i ndjerë, dhe se vrasja kishte ndodhur si hakmarrje.
Të akuzuarit, sipas Prokurorisë, në marrëveshje e bashkëveprim me njëri-tjetrin kishin studiuar terrenin me kujdes, duke u siguruar se nuk ka mbulueshmëri të kamerave dhe shtëpi në afërsi, duke i zënë priten autobusit.
