Sekretari i Përgjithshëm i NATO-s, Jens Stoltenberg, ka njoftuar se aleati transatlantik po shqyrton mundësinë e një pranie ushtarake më të qëndrueshme në Kosovë, pasi vendi ka pësuar tensione të vazhdueshme, veçanërisht në veri.
Deklarata e Stoltenberg erdhi pas takimit në Samitin e ministrave të punëve të jashtme të vendeve anëtare të NATO-s, ku është diskutuar edhe për zhvillimet në Ballkanin Perëndimor.
Sekretari i NATO-s është shprehur i shqetësuar për dhunën serioze në veri të Kosovës dhe ka deklaruar se NATO është përkushtuar në rritjen e stabilitetit në rajon.
“Së bashku me Përfaqësuesin e Lartë të BE-së ne do të diskutojmë mënyrat që të rrisim stabilitetin në rajon. NATO-ja tashmë ka shtuar 1000 trupa në Kosovë, dhe jemi duke shqyrtuar një prani më të qëndrueshme në Kosovë,” ka deklaruar Stoltenberg.
Sekretari i NATO-s ka folur edhe për procesin e dialogut mes Kosovës dhe Serbisë, duke përcaktuar se dy vendet duhet të rikthehen në tryezën e bisedimeve.
Stoltenberg ka shtuar se për një zgjidhje të qëndrueshme, Beogradi dhe Prishtina duhet të angazhohen në dialogun e lehtësuar nga Bashkimi Evropian.
“Beogradi dhe Prishtina, duhet të riangazhohen në dialogun e lehtësuar nga Bashkimi Evropian. Stabilitetit varet nga të gjitha palët që zgjedhin dialogun dhe diplomacinë, në vend të konfliktit dhe kaosit”, ka deklaruar tutje Stoltenberg.
Ndërkohë, pritet që NATO të vazhdojë të mbështesë përpjekjet për të siguruar paqen dhe stabilitetin në Kosovë në bashkëpunim me partnerët e tjerë ndërkombëtarë.
