Ministrja e Drejtësisë, Albulena Haxhiu në lansimin e fushatës “16 Ditët e Aktivizmit Kundër Dhunës me Bazë Gjinore”, ka thënë se dhuna është një sfidë që prek të gjithë.
Haxhiu, mes tjerash, potencoi se duhet të ndërtohet një mjedis ku një vajzë dhe një grua të ndihet e mbrojtur.
“Jemi mbledhur këtu për të shfaqur solidaritetin tonë dhe përkushtimin ndaj një shoqërie të drejtë të barabartë dhe pa dhunë. Dhuna në baza gjinore është një sfidë që na prek të gjithëve prandaj përpjekja jonë është e fortë është e palëkundur dhe si e tillë e përhershme për një shoqëri të ndërgjegjshme dhe kundër dhunës”, ka deklaruar Haxhiu.
“Ndërmjet veprimeve që kemi ndërmarr dhe natyrisht përmes zbatueshmerisë së legjislacionit që kemi adresuar, ne tregojmë seriozitetin e plotë se jemi të pa kompromis ndaj dhunës në bazë gjinore, dhunës në familje dhe çfarëdo dhune”.
“Ne mund të ndërtojmë një mjedis ku çdo vajzë dhe grua ndihet e respektuar, e mbrojtur në një ambient ku shteti i garanton liritë dhe drejtat e së cilit sipas Kushtetutës dhe ligjeve të Republikës së Kosovës”, tha ministrja e Drejtësisë Albulena Haxhiu.
Ministrja theksoi se kampanja “16 ditët e Aktivizmit kundër Dhunës me Bazë Gjinore” ofron një mundësi të shkëlqyer për të theksuar se solidariteti dhe veprimi i përbashkët janë forca më të mëdha ndaj çfarëdo forme të dhunës.
