Në një lokacion në Prekaz të Poshtëm të Skenderajt gjatë gërmimeve janë gjetur mbetje mortore të gjashtë personave, të cilat dyshohet të jenë nga lufta e fundit.
Kështu është bërë e ditur të premten nga Policia e Kosovës, përmes një komunikate për media.
Sipas policisë, më datë 9 nëntor të këtij viti janë gjetur skelete të tre trupave, ndërsa më 20, 21 dhe 24 nëntor janë gjetur mbetje mortore edhe të tre personave të tjerë.
“Gjatë gërmimeve-kërkimeve, janë hasë disa mbetje mortore (gjetje eshtërore) që dyshohet të jenë të disa personave nga lufta e fundit. Më datë, 09 nëntor 2023 janë gjetur skelete të tre trupave. Hulumtimet kanë vazhduar edhe ditëve në vazhdim, kështu me 20, 21 dhe 24 nëntor 2023 janë hasur gjetje edhe të tre personave të tjerë. Pra, gjatë gërmimeve në këtë lokacion janë gjetur dhe më pas janë tërhequr nga ekipet e Institutit të Mjekësisë Ligjore gjithsej trupa (gjetje eshtërore) të 6 (gjashtë) personave që dyshohet të jenë trupa të zhdukur gjatë luftës së fundit”, thuhet në njoftim.
Tutje bëhet e ditur se hulumtimet në këtë lokacion konsiderohen të mbyllura për institucionet e përfshira në këtë rast, por puna në koordinim dhe bashkëpunim mes këtyre do të vazhdojë duke trajtuar çdo informacion që do të ofrohet me qëllim të zbardhjes së rasteve tjera.
“Me këtë rast, ftohen edhe një herë gjithë ata që mund të kenë ndonjë informacion për ndonjë varr individual apo varreza të ofrojë të dhëna tek institucionet përkatëse”, përfundon njoftimi.
Ndryshe, mbetje mortore që dyshohet se janë të luftës së fundit janë gjetur rreth dy javë më parë edhe në Tusuz të Prizrenit.
Ndërkaq, në Bishtazhin të Gjakovës një muaj më parë janë gjetur eshtra kockore të rreth katër viktimave, që dyshohet se i përkasin periudhës së luftës.
