Ish-eprori i UÇK-së, Sadik Halitjaha, ka vazhduar të dëshmojë në Gjykatën Speciale.
Ai u pyet nga ZPS-ja për disa emra, të cilëve iu mbrojt identiteti.
Halitjaha tha se disa nga këta persona e kanë torturuar gjatë kohës së luftës, dhe se ai ka shërbyer si sekretar në sekretariatin e Prizrenit.
“A e njihni emrin te 54-ta, sërish pa thënë emra?”, pyeti prokurori.
“Po si mos ta themi emrin z. Prokuror se këta na kanë rrahë na kanë shkoq me dru, ne s’ia themi as emrin, ka vdek ky majmun. Ka qenë 10 vite sekretar i sekretariatit sekret të Prizrenit”, u përgjigj Halitjaha.
Halitjaha po ashtu i përmendi edhe emrat e disa shqiptarëve të cilët ai pretendon se e kishin torturuar në burgun e ish-Jugosllavisë.
“Kam parë një listë te ju me emrat e njerëzve të shërbimit sekret jugosllav, nga ata kam njohur Vesel Krasniqin, Latif Dullën dhe disa të tjerë që më ka torturu mu në burgun jugosllav. Në të njëjtën listë kam parë emrin e Jakup Muharremajt, që s’ka pasur lidhje me ta”, tha ai.
ZPS-ja pyet Halitjahën lidhur me zinxhirin komandues, ai përmend Demaçin
Prokurori James Pace e ka pyetur dëshmitarin Sadik Halitjaha lidhur me disa pjesë të librit të tij “Ne ishim e ardhmja”. Pyetje ai i ka parashtruar lidhur me fjalët që i shkroi për hierarkinë e UÇK-së.
“Në paragrafin e dytë thuhet: në UÇK është respektuar zinxhiri komandues që nga Shtabi i Përgjithshëm, komandantët e Zonave, komandantët e Brigadave, komandantët e Batalionit, komandantët e kompanive, komandant togu dhe komandant skuadre. Ky zinxhir komandimi ishte shumë i zbatuar dhe i përcaktuar me rregullore të brendshme, me rregullore rreshtore e disiplinore. Edhe pse nuk kishin grada komandantët ishin të njohur për të gjithë nga autoritetet për nga fama e tyre, por edhe nga trimëritë e tyre që ishin shndërruar gati në legjenda. Në asnjë mënyrë komandantët nuk ishin të privilegjuar, përkundrazi kishin më shumë përgjegjësi dhe ishin gjithmonë më të rrezikuarit. A është i saktë ky informacion dëshmitar”, pyeti Pace.
Dëshmitari Sadik Halitjaha u përgjigj se Shtab të Përgjithshëm gjatë luftës e llogariste Adem Demaçin dhe se zinxhiri komandues ishte i fortë nga komanda e Zonës Operative e deri te skuadrat lokale.
“Është e saktë, desha të shtoj se nga Shtabi i Përgjithshëm nuk kemi pasur urdhra me shkrim dhe nga Shtabi i Përgjithshëm nuk kemi pasur protokolle mes zonës dhe Shtabit të Përgjithshëm. Këto rregulla, krejt këtu çka shkruhen janë shumë të vërteta që nga niveli i zonës deri në nivelin e skuadrës është punuar me rregullore sepse rregulloret i ka nxjerrë zona. Rregulloret i kemi bërë ne. Unë edhe Halil Qadraku me S1-shin Vesel Maliqin dhe kështu ka funksionuar vërtetë zinxhiri komandues. Po të kishte urdhëra të cilatdo qofshin ato nga Shtabi i Përgjithshëm, që ne më shumë kemi pritur nga Adem Demaçi sepse për mua ka qenë idol Adem Demaçi. E kam ditur se ai është duke e drejtuar luftë. Ai ka thënë që të mos takohemi me gazetarë pa lejen e tij, s’jemi takuar pa lejen e tij. Çdo gjë e kemi pritur nga ai përndryshe nuk ka pasur urdhër protokolues nga asnjëra palë. Zinxhiri komandues në nivel të zonës në nivel të skuadrës dhe deri në zonë ka shkuar shumë mirë”, tha Halitjaha.
