Edhe këtë të shtunë në Prishtinë është mbajtur marsh protestues në mbështetje të Palestinës.
Kolektivi për Mendim dhe Veprim Feminist e ka organizuar marshin në solidaritet me popullin palestinez.
Një numër qytetarësh kanë marrë pjesë në marsh me pankarta që shkruanin: “Në solidaritet me Palestinën”, “Liri për Palestinën”, e të tjera.
Në Lindje të Mesme tri javë më parë shpërtheu lufta pasi grupi militant palestinez Hamas sulmoi Izraelin. Si kundërpërgjigje, Izraeli nisi me sulme të ashpra ndaj Gazës. Që nga ajo kohë ka mijëra të vrarë në dy palët dhe shpërngulje masive të palestinezëve nga Gaza, në një kohë kur Izraeli në vazhdimësi po paralajmëron pushtim të shkallës së plotë.
